Novas

13-06-2024

A nova campaña no Castro das Barreiras desvela o achado máis espectacular: unha antiga fouce

A nova campaña de escavacións no Castro das Barreiras desvela, apenas dez días despois, o achado máis espectacular e relevante dos que se levan atopado ata esta data: unha antiga fouce.

A peza, de 2.200 anos de antigüidade, é a confirmación das primeiras suposicións. As Barreiras era un centro de actividade eminentemente agrario. Ao ser concebido no fondo dun val, “fundouse e viviuse como un gran centro de explotación agrícola. Almacenaban e distribuían as colleitas”, subliña o responsable das escavacións, Tito Concheiro.

“É tremendamente emocionante atopar un obxecto que fala. Os seus habitantes almacenaban e distribuían as colleitas, anticipándose así ao mundo da Antiga Roma. Foron uns precursores”, prosegue o arqueólogo. Concheiro recalca “o valor desta peza, claramente museística e que proporciona un valor incalculable xa a nivel supragalego”. Conclúe aportando que “non hai unha peza semellante en todo a contorna da Costa da Morte”.

Foi atopada na cabana número 5, das sete que existen no xacemento. No exterior e ao nivel de ocupación, polo que todo indica que estaba depositada tal e como alí se deixou. Un elemento da actividade cotiá e que contextualiza en maior medida a vida deste xacemento, claramente na Idade de Ferro. Non apareceu o mango, polo tempo transcorrido e a caducidade da madeira que o recubría. Cabe lembrar que xa aparecera un sacho, e algún resto da punta doutras fouces, xamais destas características. Este achado coincidiu coa visita dos escolares do CEIP Labarta Pose, de Baio.