Novas

05-10-2022

O Concello, entidade colaboradora do proxecto medioambiental ‘Diversiplás, + diverso – plástico’

O Concello de Vimianzo rubrica o seu compromiso como entidade colaboradora do proxecto medioambiental ‘Diversiplás, + diverso – plástico’ levado a cabo pola Asociación Íntegro, avanzando desde a inclusión para unha Costa da Morte máis sostible. Así, o municipio conta con dous novos colectores, de cor branca para diferencialos do resto, contan cunha lenda explicativa sobre o tipo de residuos que podemos depositar e como facelo. Un quedará instalado no exterior da Casa da Cultura e outro no recibidor da Casa do Concello.

Fixeron entrega á Administración local de dous colectores para residuos, e foron recibidos e recibidas pola alcaldesa, Mónica Rodríguez, e a concelleira de Benestar, María José Pose. Xa a rapazada do Vimiverán participara durante a época estival de varias actividades centradas nas ‘3R’; Reducir, Reutilizar e Reciclar, impartidas por persoas de Íntegro.

Diversiplás é un proxecto xurdido ao abeiro da iniciativa Tanza, que está coordinado pola asociación Íntegro e conta co apoio do GALP Costa da Morte e o financiamento do Fondo Europeo Marítimo e de Pesca (FEMP), a través da Consellería do Mar da Xunta de Galicia.

A alcaldesa, Mónica Rodríguez, e a concelleira de Benestar, María José Pose, salientaron “o relevante deste tipo de iniciativas, para darlle unha segunda vida ao plástico á vez que avanzamos cara unha sociedade máis inclusiva e consciente do contexto que estamos a vivir”, apuntando que “nos parece unha marabillosa idea”.