Novas

10-09-2021

Vimianzo despedirá este domingo o programa Recunchos coa Ruta do Mel

O Concello de Vimianzo celebrará este domingo, 12 de setembro, a derradeira andaina do programa Recunchos 2021 coa Ruta do Mel, mediante a cal se poderán contemplar ata unha ducia de alvarizas situadas no Monte Faro.

Seguindo o curso do rego das Borrallas, o rego Mourelos e o rego do Monzo, poderán ser descubertas algunhas destas estruturas, que nalgún tempo fixeron deste monte un dos máis ricos da comarca en produción de mel.

Algunhas destas estruturas aínda están en uso e nelas pódense observar as colmeas. Destacan sobre as demais, polo seu tamaño, as alvarizas de Fulías, a de Lucas e por riba das demais, a de Corzón das Pasantes: unha estrutura lineal de máis de 40 cámaras que supera os 50 metros de lonxitude.

Durante o percorrido haberá degustación de produtos elaborados con mel. Non se recomenda a participación na ruta ás persoas alérxicas ás picaduras de abellas. As inscricións pecharanse mañá, venres 10 de setembro, e pódense facer efectivas a través da seguinte ligazón: https://forms.gle/hPgyRziGJv1yEjer7