Novas

02-05-2019

Vimianzo leva o seu patrimonio á Feira Ibérica de Turismo

Durante os próximos días vaise celebrar no municipio portugués da Guarda a Feira Ibérica de Turismo, un encontro para os axentes turísticos da Península Ibérica e no que a Deputación da Coruña actuará coma convidada de honra.

É por iso que nesta edición varios dos destinos provinciais cobrarán maior protagonismo, amosándolle ao público portugués e español a potencialidade dos seus recursos turísticos.

O caso vimiancés saltará á escea da feira o xoves 2 de maio ás 19 horas, co showcooking a cargo de Jorge Guitián, explicando a relevancia dos pinchos irmandiños e das características gastronómicas do evento. O complemento a esta degustación chegará ao día seguinte, o venres 3, cando ás 17 horas a sala principal do FIT coñecerá a estratexia turística vimiancesa, a súa aposta polo patrimonio en mans públicas e o modo de compatibilizar unha oferta turística viva con políticas destinadas á protección e valorización do patrimonio.

Partindo do exemplo do Asalto ao Castelo, todos os que se acheguen ata o recinto poderán coñecer polo miúdo os segredos da Ruta dos Dolmens, o Castelo de Vimianzo e a mostra de artesanía ao vivo ou dos Batáns do Mosquetín.