Novas

07-03-2019

Unha delegación de Ballynahinch (Irlanda do Norte) visitou o Concello de Vimianzo

O Concello de Vimianzo acolleu durante esta fin de semana aos representantes institucionais de Ballynahinch, pertencente á entidade local de Nerwy, Mourne and Down, de Irlanda do Norte, que realizaron unha visita institucional ao Concello e participaron no Encontro de baile e música celta que se desenvolveu o luns no Auditorio da Casa da Cultura.

A delegación norirlandesa estivo presidida por Mark Murnin, alcalde de Ballynahinch e composta por membros do tecido asociativo e cultural da zona. A relación coa entidade local de Nerwy, Mourne and Down xurdiu a raíz da participación desta xunto con Vimianzo no programa ERN4mob dedicado á emigración que culminou o pasado ano co congreso sobre a emigración que se desenvolveu en Vimianzo.

Esta visita institucional foi a resposta á visita dun grupo de música e baile tradicional das escolas culturais do concello de Vimianzo, para participar no Festival celta do Millbrook Lodge Hotel en Ballynahinch.

O luns desenvolveuse no auditorio da Casa da Cultura en Vimianzo un Encontro de baile e música celta no que participaron as escolas de baile e música tradicional da parroquia de Salto, Vimianzo e Pasarela. Ademais, durante o resto do tempo visitaron o castelo, os batáns, o castro das Barreiras, e outros puntos da Costa da Morte como Muxía de Fisterra.

O alcalde, Manuel Antelo, valora estes encontros como moi frutíferos e produtivos pois permiten o intercambio de impresións e coñecementos con persoas de distintos lugares que se enfrontan, nalgúns casos, a problemas similares aos nosos e tamén un intercambio cultural entre tradicións.

Poden acceder a fotografías do Encontro de baile e música celta premendo nesta ligazón.