Novas

A Casa da Cultura de Vimianzo acolleu o acto inaugural dun programa que permitirá formar e empregar persoas desempregadas en tres especialidades vinculadas ao sector forestal, ambiental e da carpintaría.

Os concellos de Camariñas, Muxía e Vimianzo inauguraron hoxe o Obradoiro de Emprego CAMUVI FORESTAL 2026, unha iniciativa de formación e emprego financiada pola Xunta de Galicia que busca mellorar a cualificación profesional das persoas participantes e favorecer a súa inserción laboral.

O acto celebrouse na Casa da Cultura de Vimianzo e contou coa participación da alcaldesa de Vimianzo, Mónica Rodríguez; da alcaldesa de Camariñas, Sandra Insua; do alcalde de Muxía, Javier Sar; e da delegada territorial da Xunta de Galicia na Coruña, Belén María do Campo Piñeiro.

Durante as súas intervencións, os representantes institucionais destacaron a importancia da colaboración entre administracións para impulsar iniciativas que xeren oportunidades de emprego e contribúan ao desenvolvemento socioeconómico do territorio. Así mesmo, puxeron en valor o papel dos obradoiros de emprego como ferramentas eficaces para combinar formación teórica e práctica profesional, facilitando a adquisición de competencias demandadas polo mercado laboral.

O alumnado participante recibirá formación nas especialidades de:

• MAMR0108 - Montaxe de mobles e elementos de carpintaría.
• AGAR0309 - Actividades auxiliares en conservación e mellora de montes.
• SEAG0209 - Limpeza en espazos abertos e instalacións industriais.

Ao longo dos 9 meses de duración, as persoas participantes completarán un itinerario formativo que lles permitirá obter certificados de profesionalidade e adquirir experiencia laboral mediante a realización de actuacións de interese público nos tres municipios promotores. 

Os concellos de Camariñas, Muxía e Vimianzo coincidiron en destacar que este proxecto representa unha aposta decidida pola formación, o emprego e a cooperación institucional, contribuíndo á creación de novas oportunidades para a veciñanza e á mellora dos espazos públicos e naturais dos tres municipios.O programa conta cun investimento total de 501.552 euros financiado pola Xunta de Galicia.